जन्म खेळाया मिळाला
जातीधर्माच्या कवड्या
उच्च, सवर्ण, दलित
वड्या पाडाव्या तेवढ्या
जातीधर्माच्या नावाने
होते उदरभरण
खेळीमिळीचा पापुद्रा
आत जात्यांध सारण
सरकारी कागदांत
जात-धर्म भरायचे
समता आणि बंधुता
त्यांचे काय करायचे?
आम्ही भारतीय सारे
जाती-धर्म आम्हा प्यारे
खेळवूया आनंदाने
उच्चनीचतेचे वारे
सूर्य हिंदू की मुस्लीम?
चंद्र महार की मांग?
जात कोणती तयांची?
कूळ त्यांचे काय सांग
आम्ही ब्राम्हण हुशार
तुम्ही दलित बेकार
आम्ही मराठे निडर
बाकी टरफले फार
मान-सन्मानांच्या राशी
उच्च मुजोर पायांशी
चपलांचे मानकरी
फिरती उपाशी-तापाशी
काय 'स्वातंत्य्र' साधले?
काय 'समान' जाहले?
सौंदर्याच्या वर्खाआड
किती कुरूप झाकले?
जातीधर्माच्या आरोळ्या
रोमारोमांत भिनल्या
कर्वे, फुले, आगरकर
उगा नाचल्या बाहुल्या
राजकारण मातीचे
त्याला लिंपण जातीचे
व्रत घेतले निष्ठेने
मानवाला नासायाचे
No comments:
Post a Comment